بير ائلي بوراندا قاردا چئکه جم
بير ائلي باهاردا واردا چئکه جم
بير شکيل چئکه جم گوز گيله سينه
آرزيلار دوزوله سيل سيله سينه
بير باهار سالاجام قيش چيله سينه
بير لالا خونچاسين قاردا چئکه جم
بير داغي چئکه جم دومان ايچينده
بير ياخشي بيتيرم يامان ايچينده
بير حقي دوغرولدام گومان ايچينده
شاخدادا بير آغاج باردا چئکه جم
بير سئلي چئکه جم سارا قوينوندا
بير ديلي آسيلي چارا قوينوندا
بير ائلي يارديمسيز يارا قوينوندا
بير ديلي ديلچک سيز داردا چئکه جم
تيکيلي بير آغيز چئکه جم بوما
بير درين باخيش کي فيکيره جوما
يوللايام شکيلين تهرانا قوما
بير ائلين يوخلوقون واردا چئکه جم
بير ايشيق چئکه جم اوزاقدان آتيب
بير دنيز چئکه جم دنيزه باتيب
بير ائلي چئکه جم مين ايلدي ياتيب
وارليغين بيلميرم هاردا چئکه جم
نئيله ييم ديل سيز بير باش چئکنميرم
سينمده اوره ک وار داش چئکنميرم
ائليمين گوزونده ياش چئکنميرم
بو ائلين ماهني سين تاردا چئکه جم
ائليمي باهاردا واردا چئکه جم
سوز:استاد هوشنگ جعفري زنگانلي
۲۰/۸/۱۳۷۹
|
+| نوشته شده توسط کولگه در جمعه نوزدهم خرداد 1385 ساعت 16:56
| 
