عصیان پروفسور براهنی:

آردینی اوخویون:

حماسه­لی شئیور داغین گؤرنده

کئچمیشلریم دوشر یادا آغلارام

گیزلین قالان قارا بولوت دالیندا

گونش کیمی پارلاق آدا آغلارام

آغ­بیرچکلی آنالارین گؤرکمی

سنگر یاران ایگیدلرین اردمی

اؤز یوردوندان ایتگین دوشن همدمی

منی یاخار اوددان اودا آغلارام

آشیق «نیفدی» دورار گؤزوم اؤنونده

زیل پرده­لی سازی سؤزوم اؤنونده

تهلیکه­لی آغیر دؤزوم اؤنونده

درده دؤزن مرد اؤولادا آغلارام

قوی آچیلسین قارا لئچک باشلاردان

باهار گلسین سس قاوزانسین داشلاردان

آلدادیجی نتیجه­سیز کاش­لاردان

سن بیر زادا، من بیر زادا آغلارام

نه واختاجاق قالسین سؤزوم پرده­لی

فیکریم آیدین آمما اؤزوم پرده­لی

عؤمور بویو "بارز" گؤزوم پرده­لی

منی قویان استبدادا آغلارام

عباس بارز

توپلایان:سویملی یونیس بی.

تورك ملتين باشي اوجا ياشاماغين ايسته مه ين و بو ملتين استعمارين دوشونن فارس شونيستلري (فارس ملتين باشقا ميلتلردن اوستون بيلنلر) و سانتراليستلر( سياسي و اقتصادي گوجو تهران دا و فارس- مركزي يئرلرده محدودلاشديرماق ايسته ين لر)   يوز ايله ياخين دير كي ايراندا بيز توركلرين كيمليك و وارليغيني آرادان آپارماق ايسته يبر لر. بو يولدا اؤزلليكله بيزيم ديل   ، مدنيت  و تاريخيميزي هدف توتوبلار. اونلار فرهنگي استعمارلا بيزيم ملتين سياسي واقتصادي استعمارين يولون آچماق ايسته ييرلر. ديلي اليندن آلينميش تحقير اولونان بير ملت ، دوشونوب ياراتماق و انكشاف وسيله سيندن محروم قالاراق اؤزونه گووه نه بيلمز. بو ملت استعمار اولماغا آماده دير. اونا گؤره ده شونيسمين فرهنگي ، سياسي و اقتصادي  استعمارينا قارشي مبارزه آپارماق يولو ايسه  فرهنگي مبارزه دن باشلانير. بيزيم ايلكين مبارزه يولوموز اؤز حقيقي كيمليگيميزه قاييديب اؤز وارليغيميزي منيمسه مك دير. بيزيم ملت استتثماردان قورتولماق اوچون اؤزگه لردن آسلانمادان اؤز آياغي اوستونده دورماغي باشارمالي دير. بو مبارزه هم چتين دير هم ده راحات! بير ملتين ملي شعورو آرتسا او ميلتي استعمارائله مك راحات دئيل . آز هزينه لر له ميلتيميزين ملي شعورون يوكسلده بيلريك. مبارزه نين تكجه يولو اسلحه اله آلماق يا اسلحه قاباغيندا دورماق دئيل  . وورغولانماغي فايدالي اولان  تانيديغيميز ساده يوللار دا وار:

1.       اوشاقلاريميزي توركجه دانيشديراق. اونلارا توركجه نه قدر زنگين ، گوجلو و كؤكلو بير ديل اولدوغون آنلاتمالييق.

2.    توركجه اوخويوب يازماغي اؤگرنك . توركجه گله جك نئچه ايلده گونئي آذربايجاندا ( ايران سياسي سرحدلرينده يئرله شن آذربايجان توپراقلاري) رسمي ديل قبول اولاراق مكتبلره گيرمگه شانسي وار.او گون سواد سيز ساييلماماغيميزا گؤره ايندي دن توركجه ده تحصيل آلماغا باشلامالييق. اوشاقلاريميزا دا توركجه اوخويوب يازماغي اؤگردك.   بير درين باخيشلا اؤيرنه ريك كي اوشاقلاريميز اوچون  آنا ديلده سواد ، انگليس ديلينده سواد دان داها آرتيق اهميتلي دير.

3.       اوشاقلاريميزا ، ايش يئرلريميزه توركجه آد سئچك.

4.       ايران و دونيا توركلري  و آذربايجانين دوزگون جغرافيا و تاريخين اؤيره نك.

5.    تهراندا و باشقا ايكي ديللي شهرلرده ؛ تانيماديغيميز مخاطبلريميزله دانيشيقلاريميزي توركجه ايله باشلاياق. تورك اولماديقلارين اؤگرنديكدن سونرا دانيشيقلاريميزي فارسجا يا چئوره بيله ريك.

6.    تانيشلاريميزين گوروشونه گئدركن ، بير آذربايجان موسيقي سي كاست يا سي دي ، توركجه بير فيلم،   توركجه بير كيتاب يا كيمليك ،ديل ، تاريخ و يا مدنيتيميزي تانيتديران بير يازي تحفه آپاراق.

7.       ايران دا توركجه نين محدودلاشما و ياساقلانما  نتيجه سينده ديليميزه گيرن يابانجي سؤزجوكلر يئرينه توركجه سؤزجوك لري ايشله دك.

8.    توركجه كنسرتلرده ، آذربايجان ملي مناسبتلري اوچون قورولموش تؤرن لر ده   فعال شكيلده اشتراك آپارمالييق . اؤز دوست و قوهوملاريميزي دا اؤزوموزله آپاراق.

9.       غير فارس ملتلره تعريف اولونان جوكلاري ( توركو ، عربي ، رشتي و....) قيناييب و اونلاردان اوزاق گزمه لييك.

10.   آلديغيميز جنسلرده   آذربايجان يا سرمايه سي آذربايجانلي شيركتلرين استحصالي اولان ماللارا اوستونلوك وئرمه لييك.

11.  ايلك اولاراق فضولي ، واحد و شهرياري تانيمالييق سونرا حافظ ، سعدي و شكسپيري.   ايران اؤلكه سينين وئرگي و گلير قايناقلاريندان بؤيوك بير حصه فارس ديل و مدنيتين انكشافينا خرج اولور. بيز ايسه اؤز واخت ، انرژي و پولوموزو اؤز مظلوم و يئيه سيز ديليميزه خرجله مه لييك.

12.  ماشينيميزدا ، قوناقليقلاريميزدا و عمومي يئرلرده تكجه توركجه موسيقي دن استفاده ائتمه لييك. ايلك اولاراق اؤز موسيقيميزي اؤيره نيب اؤيره تمه لييك.  دونيانين ان زنگين موسيقي لريندن بيري بيزيمكيدير. فارس موسيقي سينه حورمت بسله مه لييك اما بو زماندا فارس موسيقيسين ياييب يا اؤيرنمك، شونيسمين منفعت   و هدفلري جهتده حركت ائله مك دير.

13.  آذربايجان اداره سي و اؤلكه قانونلاري ، آذربايجانلينين نفعينه اولماديغي اينديكي زماندا آذربايجان بؤلگه سينده ، تورك اولمايان لارا يئر وشيركت لريميزن سهامين ساتماياق . اوجوزا ساتاق اؤزموزه ساتاق. آذربايجانين آذربايجاندان خارج بير چوخلو سرمايه سي تهران اسارتينده اولاركن ، صاباح ماليميزي توپراغيميزي ادعا ائدن سرمايه دارلارين سرمايه لرينه احتياجيميز يوخدور!

14.  سرمايه دار لاريميزي ، چتينليكلره دؤزه رك ، آذربايجاندا سرمايه قويماغا تشويق ائتمه لييك. آذربايجانين پارلاق گله جگين و اقتصادي پتانسيللرين   اونلارا گؤستر مه لييك. بلكه سرمايه لريميزين بير قسمين تهرانين اسارتيندن قورتارابيلك.

15.  تورك اولمايان توريستلر قاباغيندا قوناق سئور اولمالييق اما اؤز كولتور و مدنيتيميزي بئش پارايا ساتاراق اونلارين فرهنگرينه وورولماياق . توريستلرين فرهنگلرينين منفي شئي لرين آلماق يئرينه ، اؤز فرهنگيميزين مثبت لرين اونلارا گؤستر مه لييك.

16.  اؤز كيمليگيميزي تانيتديراندا دئه يك من توركم و ديليم توركو دور. دئمه يك آذري ام يا ديليم آذري دير . اؤز دوغوم يئر يا جغرافيايي كؤكوموزو آنلاتاراق دئيه ك : آذربايجانلي يام.

17.   اولدوقجا سانتراليست سراسري گونده ليكلري و قزئتلري آلماييب   و آذربايجان سئور نشريه لري حمايت ائدك.

18.  سراسري و شونيست تشكيلاتلاردا اشتراك آپارماييب و اونلاردان حمايت ائتمه يك. تورك ملتين دردين قانيب ، بو ملت و آذربايجانين مسئله لرين حلين دوشونن آدام و تشكيلاتلاردان حمايت ائتمه لييك.

19.  دوزگون توركجه يازماق باشارماساق دا آنجاق تبريك و توي كارتلاريميزي ، آراميزدا يازيلان اس ام اس لر يا اي-مئيل لري يالنيز توركجه ده يازاق.

20.  زنجان ، اردبيل ، تبريز ، اروميه ، باكو ، نخجوان ، گنجه و... هاميسي آذربايجانين شهرلري ديرلر. تحميلي سيستملر نتيجه سينده بو شهرلر آراسيندا يارانان كيچيك   فرهنگي اختلافلارا باخماياراق بو شهرلرين نفوسو هامي توركدور. اؤزايچيميزده اولان آچيق و معنوي دستكلريميزله شونيسمين تفرقه سياستين نتيجه سيز قوياق. بيزيم داياز اختلافلاريميز ، بيزه قارشي شونيسمين درين نفرتينين قاباغيندا گؤز اؤروتولمه لي دير. بيزيم هره ميز ، بير بيريميزين گوجله نمه سينه فايدالي اولان بؤيوك پتانسيللريميز وار.

بو يازيني اوخويوب ،تانديغيميز آداملار آراسيندا داغيداليم. اوخويوب دوشونه ليم. دوشونجه لريميزي ايسه اوتانمادان چكينمه دن كاغذ اوستونه گتيرك. انسانين هر بير دوشونجه سي دگرلي دير.

سني ياشاداجاييق آذربايجان.